महू बनतेंव अँगरेजिन बलम अंगरेजी सिखो दे।
जींस अउ टाप बलम मैं पहिनतेंव ।
बाबकट चुंदी कटा के गिंजरतेंव।।
गोठियातेंव अंगरेजी
बलम अंगरेजी सिखो दे। ।
ऊँच एड़ी गेंड़ी कस सेंडिल लेवातेंव।
साँप बिच्छी के देह भर गोदना गोदातेंव।।
रूप सजातेंव अंगरेजी।
बलम अँग्रेजी सिखो दे।
फिल्मी गाना मा कन्हिया मटकातेंव।
डीजे के धुन मा अउ गदर मतातेंव।
ददरिया गातेंव अंगरेजी।
बलग अंगरेजी सिखो दे।
हाय हैलो कहिके जवाब ला देतेंव।
आनलाइन शापिंग के मैं मजा लेंतेंव।।
हेलो बाय करतेंव अंगरेजी।
बलगम अंगरेजी सिखो दे।
कम्पूटर रोबोट ले बूता करतेंव।
इंटरनेट ले सब जनारो मँगातेंव।।
व्हाट्सएप चलातेंव अंगरेजी।
बलम अंगरेजी सिखो दे। ।
बेटा बेटी घलो मैं नइ जनमातेंव।
वहूला बैज्ञानिक बिधि ले बनवातेंव।।
नाव धरतेंव अंगरेजी।
बलम अंगरेजी सिखो दे। ।
शोभामोहन
०१/०३/१७
झीट पाटन
No comments:
Post a Comment