#####################

जोत ले परिया खेत

####################

जोत ले परिया खेत रे हँसा,

जोत न परिया खेत ।

आवत-जावत साँस सधै तब,

अमरित के घट देत ।।

रे हँसा जोत ले परिया खेत.............१/

बेर कटारी जइसे होके,

देही टोंटा रेत ।

रे हँसा जोत ले परिया खेत .............२/

अंग जनावत हे शुभ मंगल

बेरा देउत देत ।

रे हँसा जोत ले परिया खेत.............३/

बन काँदी के जर उपकाये,

थोरिक तो चेत ।

रे हँसा जोत ले परिया खेत.............४/

दिन-दिन पाग बतर के बुलकत,

चूँदी होवत सेत ।

रे हँसा जोत ले परिया खेत..............५/

का-का जोरन-भारन हावय,

बकठउनी सब लेत ।

रे हँसा जोत ले परिया खेत............६/

अब उराठ कहूँ नइ होये,

परही जगती बेत ।

रे हँसा जोत ले परिया खेत............७/

शोभामोहन सँभल-सँभल चल,

जाये कोती नेत ।

रे हँसा जोत ले परिया खेत.............८/

शोभामोहन श्रीवास्तव

खुश्बूविहार

१९/०६/२०२०

11Mohan Srivastava Poet, Archna Dubey और 9 अन्य लोग

8 कमेंट

लाइक करें

कमेंट करें

शेयर करें