*ओ नारी*

तँही कुँवारी, तँही पियारी,

तँही सुवारी ओ नारी ।

तँही अगाड़ी तँही पिछाड़ी,

तँही अधारी ओ नारी।।

तँही बनाये तँही सजाये,

मया बढ़ाये ओ नारी ।

तँही बियाये तँही जियाये

तँही बचाये ओ नारी ।।

तँही हटाये तँही मिटाये,

तँही तँही घटाये ओ नारी ।

तँही छँटाये तँही बँटाये,

तँही कटाये ओ नारी।।

तँही जँचाये तँही खँचाये,

तँही टँचाये ओ नारी ।

तँही रचाये तँही मचाये,

तँही नचाये ओ नारी ।।

तँही सहारे तँही किनारे,

तँही अपारे ओ नारी ।।

कहूँ बिदारे कहूँ पधारे,

कहूँ सुल्हारै ओ नारी ।।

शोभामोहन श्रीवास्तव

खुश्बूविहार साँकरा

१९/०६/२०२०