रंग भंग न डारहू गीतिका

2122 2122 , 2122 212

आज पुन जागे हवय अउ,साध मन चुप होत हे

सब अड़ानीपन भुलागे,देह अब बिटोत हे।

देख हे निच्चट कलेचुप, रंग भंग न डारहू

चित्त के तरिया म कोनो,कंकरी झन मारहू ।।

हाय उठही तेन लहरा,पार खोजे भागही

तन धँवाही प्रान ला तब, चेत ओती जागही।

हे हथौंड़ा परत कहिके,सोग तो न बघारहू

चित्त के तरिया म कोनो,कंकरी झन मारहू ।।

चेत के डबरा म गंगा,जल पझारे साध हे

ये कुलुप अँधियार अंतस,दीप बारे साध हे।

ठान ठाने हँव जबर मँय, हाँक तुम झन पारहू

चित्त के तरिया म कोनो,कंकरी झन मारहू ।।

शोभामोहन