सबो दिरिस तोरे जस गाये
हर मुहरन में तहीं लुकाये ।
सबो दिरिस तोरे जस गाये ।।
भिनसरहा रक्तालाली मा ।
मंँझन छन बुलकत जाली मा।।
झूलफुलहा के खुशियाली मा।
आज परनदिन अउ काली मा।।
तोर होय के ढंग जनाये ।
हर मुहरन में तहीं लुकाये।
सबो दिरिस तोरे जस गाये ।।
चंदा तारा जुड़वासा मा ।
चित अउ पट दूनो पासा मा।।
सुनता बिमता के बासा मा ।
अनचिन्हार रहिके साँसा मा।।
निचट कलेचुप तँही समाये ।।
हर मुहरन मा तहीं लुकाये।।
सबो दिरिस तोरे जस गाये ।।
गमकत भुँइया फूलवारी मा ।
बेरा के पहरादारी मा ।।
अटलसोहागी सिंगारी मा।
रेफ सोनहा उजियारी मा।।
सरभर सुघरइ तहीं बसाये।
हर मुहरन मा तँही लुकाये ।।
सबो दिरिस तोरे जस गाये ।।
शोभामोहन श्रीवास्तव
No comments:
Post a Comment