गीत पझरथे ये का कम हे
ठकठक ले सुक्खाय चुआ ले, गीत पझरथे ये का कम हे।
कबिता के डोला परछन बर, कलम सँभरथे ये का कम हे।।
छान्ही ले बुलकत गर्दा संग, किरन उतरथे ये का कम हे।
आखर के फुलवारी क्यारी, मनसुख भरथे ये का कम हे।।
सरभर चिखला छबड़े हंसा, मोती चरथे ये का कम हे।।
बिगन टकर पैडगरी रद्दा, पाँव पकरथे ये का कम हे।।
मोह-द्रोह के बइहापूरा, छूवत निकलथे ये कम हे।
नदिया लहसे डार झमाझम, पंखा झलथे ये का कम हे।।
खड़े अगोरा सुन्ना डिलवा, आसूँ ढलथे ये का कम हे।
पथराये कठुवाये हिरदे, चिटिक टघलथे ये का कम हे।
मतलाये बिस्सर तरिया में, कमल छछलथे ये का कम हे।।
रमजायें पाँखी के सुवना, फेर संभलथे ये का कम हे।
शोभामोहन
No comments:
Post a Comment