पंथी गीत
गुरु ज्ञानी कर मिल, गुरु ज्ञानी कर मिल।
गुरुबर जोत ला जलाही झिलमिल।।
ज्ञान हर पबरित चोला के करैया हे,
चोला के करैया हे चोला के करैया हे।
चौरासी भँवरी ला अधरे तरैया हे।
अधरे तरैया हे, अधरे तरैया हे।
छोड़ सब चिलचिल छोड़ सब चिलचिल।
गुरुबर जोत ला जलाही झिलमिल।।
गुरु ज्ञानी कर मिल, गुरु ज्ञानी कर मिल।
गुरुबर जोत ला जलाही झिलमिल।।
भँवरी फदक के ये जीव दुख भोगे रे।
जीव दुख भोगे रे, जीव दुख भोगे रे।।
जग हर हाँसे थूकै गुरु करै सोगे रे।
गुरु करै सोगे रे, गुरु करै सोगे रे।।
झन मर तिलतिल झन मर तिलतिल।
गुरुबर जोत ला जलाही झिलमिल।।
गुरु ज्ञानी कर मिल, गुरु ज्ञानी कर मिल।
गुरुबल जोत ला जलाही झिलमिल।।
गुरु हा बताही बाट बन जा तैं चेला रे।
बन जा तैं चेला रे, बन जा तैं चेला रे।।
एकली बाट में कइसे जाना हे अकेला रे।
जाना हे अकेला रे, जाना हे अकेला रे।।
हीरासुध कर दिल हीरासुध कर दिल।
गुरुबर जोत ला जलाही झिलमिल।।
गुरु ज्ञानी कर मिल, गुरु ज्ञानी कर मिल।
गुरुबर जोत ला जलाही झिलमिल।।
शोभामोहन सरन गुरुबर ज्ञानी के।
गुरुबर ज्ञानी के, गुरुबर ज्ञानी के।।
लाज ला बचाही उही अधर अड़ानी के।।
पानी में मछरी ढिल, पानी में मछरी ढिल।।
गुरुबर जोत ला जलाही झिलमिल।।
गुरु ज्ञानी कर मिल, गुरु ज्ञानी कर मिल।
गुरुबर जोत ला जलाही झिलमिल।।
शोभामोहन श्रीवास्तव
बइसाख अंधियारी तिथि दसमी
विक्रम संवत २०८१
शुभस्थान-महुदा
No comments:
Post a Comment