जय जय नंदलला
जय-जय नटवर-नागर, करुणाकर हे।
यसुमति के प्रिय प्रान, जय-जय नंदलला।।
पिंयर-पिंयर ढ़िक-हरियर, पीताम्बर हे।
लर-लर गर-भर हार, जय-जय नंदलला।।
सहस-सुरुज कस चमकत, छबि दमकत हे,
जीवजगत रखवार, जय-जय नंदलला।।
जझरंग भसरंग मनरंग, दह कूदत हे,
सखिन सखा चिचियात, कहि जय नंदलला।
देखिन छेंकिन नागिन, कउवा गिन हे,
कहिन सुन लौ सुकुमार, जय-जय नंदलला ।
लड़-भिड़ फन चढ़ बिखहर, कर दिस थर हे।
नागिन कर जोर मनात, जय-जय नंदलला ।।
फन चढ़ नाथत बिखहर, मुरलीधर हे,
देवतन फूल बरसात, जय जय नंदलला।।
अकबक-सकपक-ब्रजजन, सब अपलक हे,
करमन देखि डरात, कहि जय-जय नंदलला।।
शुभचन्द्रसूर्या शोभामोहन
No comments:
Post a Comment